वायुप्रदुषण प्रभाव: हुम्लामा तुवाँलोले दुई दिनदेखि हवाई सेवा प्रभावित

वायुप्रदुषण प्रभाव: हुम्लामा तुवाँलोले दुई दिनदेखि हवाई सेवा प्रभावित

सिमकोट, १७ चैत । 
हुम्लाको मुख्य यातायातको साधनका रूपमा रहेको हवाई सेवा दुई दिनदेखि प्रभावित भएको छ । हुम्लामा लागेको बाक्लो तुवाँलोका कारण सिमकोट विमानस्थलको हवाई सेवा दुई दिनदेखि प्रभावित भएको हो । 

आइतबार बिहानदेखि देखिएको धुवाँजस्तो देखिने तुवाँलोका कारण दुई दिनदेखि नेपालगञ्ज तथा सुर्खेतबाट हुने सम्पूर्ण हवाई सेवा बन्द भएको छ । तुवाँलोको कारण दई दिनमा दुई दर्जनभन्दा बढी उडान रद्द भएका छन् । तुवाँलोले सोमबार साँझसम्म पनि जिल्लाभर छोपेकाले आज पनि उडानको सम्भावना कम रहेको छ । उडान नभएपछि यात्रुलाई आवतजावत गर्न असहज भएको छ । 

काठमाडौँसहित देशभर असर गरेको वायुप्रदूषणले हुम्लाको हवाई सेवा प्रभावित बनाएको हो । आइतबार बिहानदेखि भिजिबिलिटी नपुग्दा दुई दिनदेखि हवाई सेवा प्रभावित बनेको हो । हुम्लाको एक मात्रै अन्तर जिल्ला जोड्ने हवाई सेवा प्रभावित हुँदा निर्माण सामग्रीदेखि दैनिक उपभोग्य सामग्रीको ढुवानीमा समेत समस्या भएको छ । नेपाल खाद्य व्यवस्था तथा व्यापार कम्पनी लिमिटेडको खाद्यान्न ढुवानीमा समेत बाधा पुगेको छ ।