चालकको निगरानीका लागि ठूला गाडीमा 'ट्राफिक कम्युनिकेशन एप्स'
eNewsnepal
Feb 10, 2019
माघ २७, काठमाडौं । प्रहरी प्रधान कार्यालयले सवारी दुर्घटना न्यूनीकरण तथा सुरक्षित यात्राका लागि आजबाट ट्राफिक कम्युनिकेशन एप्स’ सञ्चालनमा ल्याएको छ ।
प्रहरी प्रधान कार्यालय, राजमार्ग सुरक्षा तथा ट्राफिक निर्देशनालयले लामो दूरीमा चल्ने यात्रुवाहक सार्वजनिक सवारी साधन चलाउने चालक परिवर्तन भए नभएको जानकारी दिने उद्देश्यले आजदेखि उक्त एप्स सञ्चालनमा ल्याएको हो ।
लामो दूरीका सवारी चालक, बस नम्बर तथा प्रस्थान समय इन्टरनेटको सर्भरमा राखेपछि विभिन्न प्वाइन्टहरुमा जाँचकाक्रममा उही चालक भेटिएमा कारवाही गरिने व्यवस्था गरिएको छ । महानगरीय ट्राफिक प्रहरी महाशाखाका प्रमुख वसन्त पन्तले एप्स सञ्चालनसँगै यात्रुवाहक सवारी साधनमा दुईवटा चालक राखिने हुँदा दुर्घटनामा कमी आउने बताए।
एप्स ओराकल कम्पनीको जाभा प्रोगामिङ ल्याङ्ग्वेजको एन्ड्रोइड भर्सनमा विकास गरिएको महानगरीय ट्राफिक प्रहरी महाशाखाले जनाएको छ।
उक्त एप्स पहिलो चरणमा काठमाडौँको नागढुङ्गामा, प्रदेश–२ को सर्लाहीको कर्मैया र प्रदेश–५ को बाँकेको कोहलपुरमा एप्स सञ्चालनमा ल्याइएको छ । आगामी दिनमा लामो दूरीका सबै क्षेत्रमा एप्स सञ्चालन गर्ने प्रहरी प्रधान कार्यालयले जनाएको छ ।
Facebook Comments