मध्यपहाडी लोकमार्गको विस्तार तीव्र

पर्वत, १६ चैत । 
कोरोना महामारीका कारण रोकिएको मध्यपहाडी लोकमार्ग अन्तर्गत पर्वत खण्ड विस्तारको कामले तीव्रता पाएको छ । 

थपिएको म्यादभित्र काम सक्नुपर्ने दबाबका कारण निर्माण कम्पनीले कामलाई गति दिएको हो । गएको भदौमा सकिनुपर्ने काम अहिलेसम्म नसकिएपछि थपिएको नौ महिनाको अवधिमा काम सक्नुपर्ने बाध्यताका कारण निर्माण कम्पनीले तीव्र रुपमा कामलाई अघि बढाएको हो ।

जिल्लाको २४ किलोमिटर खण्डमध्ये कुश्माबजारभित्र र पातीचौर बजार क्षेत्रमा चार लेनको सडक विस्तार हुँदैछ भने अन्य स्थानमा दुई लेनमा सडक विस्तार गरिने भएको हो । कुश्मास्थीत आयोजना कार्यालयका प्रमुख मेघराज मरासिनीका अनुसार मोदी गाउँपालिकाको पातीखोलादेखि कुश्मा– ७ चुवाको परादीसम्म कालोपत्रको काम सकिएको छ । 

कुश्मामा विद्युतका पोल हटाएरबीच खण्डमा माटो भर्ने काम भइरहेको छ । पातीचौरमा कालोपत्र गर्न सबै स्टक्चर तयार भइसकेको छ । ‘लकडाउन नभएको भए पर्वत खण्डको काम अहिलेसम्म सकिन्थ्यो,’ मरासिनीले भने, “तीन किलोमिटर प्राइम गरिसकेको छ । आगामी असारभित्रै सक्ने लक्ष्य दिएको छु । अब समय थपिँदैन ।”

सडक विस्तारमा अवरोध रहेका सबै संरचना हटाएपछि कुश्मामा सबैजसो कामदार परिचालन भएका छन् । चुवा, कुश्माको बान्द्रेबिँडी र मोदीको केही भागमा भिरको पहरो फुटाएर सडक चौडा बनाइएको छ । लामा कन्स्ट्रक्सनका प्रतिनिधि राजाराम आचार्यले आउँदो जेठभित्रै पर्वतखण्ड सकिने तयारीका साथ काम भइरहेको बताए ।

“अहिले १८० भन्दा धेरै कामदारले काम गरिरहेका छन्,” आचार्यले भने, “गर्मी बढ्दै गएकाले अब कालोपत्र धमाधम हुन्छ ।” सडक चौडा, नाली, मेसिनरी वाल, ग्याबिनलगायतको सबै काम सकिएकोले कालोपत्र मात्रैका लागि धेरै समय नलाग्ने उनी बताउछन् ।  

२०७५ वैशाखदेखि शुरु भएको पर्वत खण्ड विस्तारको काम गएको गत भदौमा सकिनुपर्ने थियो । कोभिडका कारण भएको लकडाउनले रोकिएपछि आयोजना कार्यालयले नौ महिना समय थप गरेको छ । तत्कालीन आयोजना प्रमुख आशिष थापा मगरले कास्की, पर्वत र बागलुङ खण्डमा अपेक्षित काम भएकोले अब थपिएको मितिमै काम सकिने बताउँदै आएका थिए।

मध्यपहाडीको कास्की खण्डको नयाँ पुलदेखि घट्टेखोला सम्मको खण्डको काम सकिएको छ । हेम्जादेखि सिम्पानीसम्मको खण्ड सकिएमा कास्की खण्डको काम पूरा हुनेछ ।