सोमालियाको राजधानीमा कार बम विस्फोट हुदा कम्तीमा ९० जनाको मृत्यु
१३ पुस, मोगादिसु (ऐजेन्सी)
सोमालियाको राजधानी मोगादिसुको एक व्यस्त क्षेत्रमा कारमा राखिएको शक्तिशाली वम विस्फोट हुँदा कम्तीमा ९० जनाको मृत्यु भएको छ ।
घटनामा कम्तीमा ७० जना घाइते भएका छन् भने मृत्यु हुनेमा केही स्थानीय विश्वविद्यालयका विद्यार्थीसमेत रहेका अधिकारीले जनाएका छन्।
उक्त विष्फोट सोमालियाको राजधानी मोगादिसुको दक्षिणपश्चिमको चोकमा भएको हो । उक्त स्थानमा सुरक्षा जाँचका लागि बनाइएको अस्थायी सुरक्षा पोस्ट र कर कार्यालयसमेत रहेकोले विष्फोटमा धेरै जनाको मृत्यु भएको एक प्रहरी अधिकारीले बताए ।
घाइतेहरूको स्थानीय अस्पतालहरूमा उपचार भइरहेको र घाइतेमध्ये दर्जनौँको स्वास्थ्य अवस्था गम्भीर रहेकोले मृतक सङ्ख्या थप बढ्न सक्ने यहाँको प्रहरीले जनाएको छ ।
प्रहरीका अनुसार घटनामा विद्यार्थी तथा टर्कीबाट सडक निर्माणका लागि खटिएका श्रमिक तथा केही इन्जिनियरहरूसमेत परेका छन् ।
Facebook Comments